பிறகொரு சமயம் பார்த்துக் கொள்ளலாமென
சிறகு ஒடுக்கி கூட்டுக்குள் சிட்டுக்குருவி;
கூட்டுக் குருவியின் குரல் தேடி கரம்
நீட்டுகிறது வெயிலின் வெள்ளை நிழல்;
நிழலின் பாதையில் நீளும் மணலெங்கும்
அகழிக் கோட்டைக்குள் அவசர நண்டுகள்;
நடந்தறியா நண்டொன்றை கரை நோக்கி
நகர்த்துகிறது முகத்துவார நதியின் முதல் அலை;
அலையடித்துக் கொண்டே இருக்கிறது;
அனலடித்துக் கொண்டே இருக்கிறது;
அந்த விழாத முதல் துளியில்தான் இருக்கிறது
அடுத்த மழையின் முகவரிக் குறிப்பு;