மழை பொழிந்த பூமி இஃதென்றால்

பிழையாகிப் போகக் கூடும்;

வறண்டு போனது என் வானம்;

மறந்து போனாயோ கண்ணா நீ?

என்னிடம் ஏதும் சொல்லாமல்

எங்கே சென்றாய் நீயென

தேடித் தொலைந்து கொண்டிருக்கிறேன்;

எங்கே சென்றாய் கண்ணா நீ?

எங்கும் கேட்காத உன் குரலுடன்

எங்கோ ஓடி ஒளிந்து கொண்டன

என் செவிகள்!

கேட்க ஏதுமின்றி

தேடித் தொலைகிறேன் நான்;

எங்கே சென்றாய் கண்ணா நீ?

எங்கும் தென்படாத உன் பார்வையுடன்

எங்கோ மங்கி மறைந்தன

என் விழிகள்!

பார்க்க ஏதுமின்றி விழி

வேர்த்துக் கரைகிறேன் நான்;

எங்கே சென்றாய் கண்ணா நீ?

உன் குழலோசையும் குரலோசையும்

என் உயிர் கேட்கும் மொழியறியும்;

உன் விழியசைவும் விரலசைவும்

என் உணர்வுறைவிக்கும் வழியறியும்;

அழுது நனைத்த இமைகள் உன்

அத்தனை அசைவினையும் அறியும்

எனில் கண்ணாமூச்சி போதும் கண்ணா.

என் கண் முன்னே வந்து விடேன்!

என்னையும் சேர்த்து

இந்த உலகம் உயிர் கொள்ளட்டும்!!!