Good bye 2011

இரண்டாயிரத்து பதினொன்றின் இறுதி இரவில் இல்லம் நோக்கிப் பயணித்துக் கொண்டிருக்கிறேன். 2011ன் இரவென்று சொல்லி விட முடியாது. நள்ளிரவு என்று சொல்லிக் கொண்டிரும்போதே 2012 பிறந்து விடும் நிறைய நம்பிக்கைகளைச் சுமந்து கொண்டு. பேருந்தின் இரண்டாவது இருக்கையில் பயணம் என்பதை விட, அமர இருக்கை கிடைத்ததே பெருமகிழ்ச்சி. சன்னலுக்கு வெளியே கடக்கும் இரவு தெளித்த வாசல்களில் நேற்று பெய்த அடை மழையின் மிச்சங்கள். ஒற்றை குண்டு பல்பு எரிய அடைத்த வீடுகளுக்குள் உறங்கப் போய் விட்ட இந்தக் குடும்பங்களுக்கும் நாளை புத்தாண்டு தான். வயது வித்தியாசமின்றி டாஸ்மாக் வாசலில் கூடிக் குதூகலித்துக் கொண்டிருக்கும் கூட்டத்திற்கும் நாளை புத்தாண்டுதான். என்ன! நாளைய விடியலில் அவர்கள் நாற்று நட,, கட்டிடம் கட்ட, சாலை பராமரிக்க, சுத்தம் செய்ய என வேலைக்குப் போவார்கள். இவர்கள் கொண்டாட்டத்தின் அயர்வில் உறங்கிக கொண்டிருப்பார்கள். புத்தாண்டு விடிந்துதான் இருக்கும். மகிழ்ச்சியாகக் கொண்டாடுபவர்களைப் பார்த்து உனக்கு ஏன் இத்தனை கோபம் என்பீர்கள். கோபம் ஒன்றுமில்லை. குடி போதையில் அங்கே விபத்து, இங்கே பிரச்சனை என்று கேட்காமல் இருந்தால் சரிதான்.

2011 WAS A TOUGH YEAR என்று சொல்லிப் புலம்பியதுண்டுதான். ஆனால் 2011 தான் என் மேலாண்மைத் திறனை எனக்கு உணர்த்தியது. கடினமான சந்தர்ப்பங்களைச் சமயோசிதமாக சமாளிக்கும் சாமர்த்தியத்தைக் கற்றுக் கொடுத்தது. தனித்து விடப் பட்டாலும் தழல் போல் போராடும் சக்தியைக் கற்றுக் கொடுத்தது. தினமும் தாமதமாகத் தான் அறை(அ)) வீடு திரும்ப வேண்டும் என்றாலும் சலித்துக் கொள்ளாமல்  அலுவலகம் செல்லும் பொறுமையைக் கற்றுக் கொடுத்தது. பெரியப்பாவின் மறைவு, சில முள் மணிகள், நிறையப் போராட்டம் எனக் கடந்தாலும் அறிவும், சமூகத்தில் மரியாதையும் உயர்ந்தது,,,அழகான புதிய நட்புக்களின் வரவும், எல்லாவற்றுக்கும் மேல் என் கல்லூரி நண்பர்களுடன் மீண்டும் இணைந்தது என்று 2011ன் கொடை ஏராளம்.

கண்ணாடியில் எழுத்து, புகைப்படங்கள் எனப் பதிவு சதமடித்தது சிறப்பு.. மாற்றங்கள் வளர்ச்சிக்கான மாற்றங்கள் என எடுத்துக் கொள்கிறேன்.

2011த்தைச் சிறப்பாக்கிய சுற்றத்திற்கும், நட்பிற்கும், சக பணியாளர்களுக்கும்,, வாடிக்கையாளர்களுக்கும், அப்பா, அம்மா, அண்ணா, தம்பி அனைவருக்கும் நன்றி. இன்று பிறந்த நாள் கொண்டாடும்  அம்மாவிற்கு .ஆயிரம் நன்றிகள் மற்றும் வாழ்த்துக்கள்.

BYE BYE 2011.

WELCOME 2012.

HAPPY NEW YEAR…………………………………… LOVE ALWAYS KANCHANA…