இரவின் மடியில்

நிலவும் தூங்க சென்று விட்ட

நிச்சலனப் பொழுது!

இரவு விளக்கின்

மங்கிய வெளிச்சத்தில்

விழித்திருப்பதாய் தோன்றும்

சில உறங்கும் வீடுகள் தொலைவில்.

இலைகளைக் கூடத் தாலாட்டித்

தூங்க வைத்து விட்டது

என்னுடன் விழித்திருக்கும்

குளிரில் குளித்த தென்றல்.

உறங்க நினைத்து

சன்னல் சாத்துகையில்

உயிரோட்டத்துடன் தெரிகிறது-

விடியும் முன்

சமைத்து குளித்து

நாளைய பகலுக்கு

வாழ்க்கையைத் தயார் செய்யும்

நடைபாதையோரக் குடும்பங்களின்

உறங்காத உலகம்.