திருப்பாவை பாசுரம் 12
கனைத்திளங் கற்றெருமை கன்றுக் கிறங்கி
     நினைத்து முலை வழியே நின்று பால் சோர
நனைத்து இல்லம் சேறாக்கும் நற்செல்வன் தங்காய்
     பனித்தலை வீழ நின் வாசல் கடை பற்றி
சினத்தினால் தென்னிலங்கைக் கோமானைச் செற்ற
     மனத்துக்கு இனியானைப் பாடவும் நீ வாய் திறவாய்
இனித்தான் எழுந்திராய் ஈதென்ன பேருறக்கம்
     அனைத்து இல்லத்தாரும் அறிந்து ஏல் ஓர் எம்பாவாய்

எம் பாவை 12

நீயே என் மீட்பன் என்பதை நானறிவேன்;

நீயே என் தேவன் என்பதை நானறிவேன்;

நீயே என் தோழன் என்பதையும் நானறிவேன்;

நீ சொன்னாய் என்றே நிற்காமல் இதோ

நீந்திக் கொண்டிருக்கிறேன்- தீயாற்றிலிருந்து மீட்க

நீ எப்போது உன் கரம் நீட்டுவாய் என

நீண்ட இரவினில் காத்துக் கிடக்கிறேன்!

வைகுந்தவாசா! திருமகள் நேசா!

மையிட்ட விழிகள் திறந்தே எனக்கு

மழை அருள்வாய்! பிழைத்துக் கொள்கிறேன்!

-காஞ்சனா